SHAIRI: NIPENDE NIKUPENDAVYO

Sauti nainururi, swahibu nakuswabahi

Tabasamu desturi, kuchukia hujawahi

Mola wetu tusitiri, usiku na asubuhi

Utujazie mazuri, mapenzi tuyasabahi

Nakuita laazizi, itika kwa tabasamu

Hata kama unakazi, ishike yangu salamu

Mitihani kwetu ngazi, upoe na majukumu

Moyo wangu upo wazi, salamu yangu ni hamu

Maridhia samahani, uridhie moyo wangu

Nimekupenda zamani, ukawa jirani yangu

Kukutoa mawazoni, hilo jukumu ni langu

Kupenda boga mtini, maua wajibu wangu

Vumilia tabasamu, mimi ni wako swahibu

Ninakupenda hamumu, kama tunda ni zabibu

Salamu mashamshamu, mola atupe thawabu

Nakupenda mahamumu, kwako wangu sina tabu

Uzuri wa sura yako, mfanoe sijaona

Na umbo la mwili wako, atukuzwe maulana

Unipe na radhi zako, tukaishi wote janna

Niwapo karibu yako, nazidi furaha sana

Mpenzi nikupe siri, hujapata kuijua

Mume wangu we mzuri, idara zimetimia

Hakika wanisitiri, na madhila ya dunia

Nakupenda sio siri, sina budi kukwambia

Usichoke nihimize, niwe kwako mke bora

Haki kwako nitimize, kwa mola niwe mbora

Kwa marimba hata zeze, zikamilike ibara

Daima tutangulize, mazuri yetu akhera

Sina budi katamati, itue yangu salamu

Tuipange mikakati, tupate sote elimu

Mazuri tuweke kati, mapenzi yawe ya hamu

Mapenzi yangu ya dhati, nakupenda mahamumu

Mtunzi: Mwinyi Abdallah

Phone:  0655895599

Email: Mwinyiabdallah2012@gmail.com

Download here  SHAIRI: NIPENDE NIKUPENDAVYO