SHAIRI: MALENGO ENDELEVU

      Duru ninazialisha, hapa kule huku kile

Leo ninabainisha, mbeleni toka ya kale

Sera zilimakinisha, uhuru tujitawale

Kwa malengo endelevu, hayapati uchakavu

      Vyema tukaikalia, ardhi yenye rutuba

Uchafu tukiondoa, salama maji ni tiba

Jamii kuizindua, misitu kwetu haiba

Kwa malengo endelevu, hayapati uchakavu

     Uoto ukinawiri, ukijani ukatanda

Mbuga zetu mashuhuri, tutapata kuzilinda

Majanga yaso mazuri, daima kutotuwinda

Kwa malengo endelevu, hayapati uchakavu

      Maji safi na salama, nguvu kazi kutugea

Watoto baba na mama, daima kufurahia

Mashamba watayalima, mvua kujinyeshea

Kwa malengo endelevu, hayapati uchakavu

      Haki pia na amani, huleta uadilifu

Kwa watu pia kazini, nguvu kazi maradufu

Uhusiano jirani, viongozi wanadhifu

Kwa malengo endelevu, hayapati uchakavu

      Kipaumbele elimu, watu wapate elimu

Wapatikane walimu, wasimamie nidhamu

Wamsingi kwa awamu, yazidi mashamshamu

Kwa malengo endelevu, hayapati uchakavu

      Afya bora kila kona, vituo kote viwepo

Dawa pia ni amana, kila kituo ziwepo

Vijiji vingi hakuna, hima wahini walipo

Kwa malengo endelevu, hayapati uchakavu

      Viwanda tuvijengeni, tuvigawe kila kona

Mazingira boresheni, uoto kwetu dhamana

Na ajira zigaweni, wapate kazi vijana

Kwa malengo endelevu, hayapati uchakavu

      Malengo tumeyaweka, kwa malengo endelevu

Malenga nimeandika, hayapati uchakavu

Ardhi tukiishika, nishati kwetu angavu

Kwa malengo endelevu, hayapati uchakavu

          Tamati nimefikia, hima jama zingatia

Malengo yakitimia, tumepata bora njia

Vizazi vinofatia, vyema watayatumia

Kwa malengo endelevu, hayapati uchakavu

MTUNZI: MWINYI ABDALLAH

TEL: +255655895599

EMAIL: Mwinyiabdallah2012@gmail.com