 |
| chumvi |
Napatwa na mtihani, majibu sijui nini
Tafakari ya mwanzoni, chochote sijabaini
Moyoni ninayakini, jambo hili sio geni
Chumvi mimi masikini, sina thamani chunguni
Sina thamani chunguni, kwa chochote masikini
Nimekwepa mitihani, nafasi yangu mwishoni
Na kila ajae ndani, mimi nipo lawamani
Chumvi mimi masikini, sina thamani chunguni
Sendi mwenyewe chunguni, natupiwa lawamani
Nikizidi sana ndani, nazidishwa tafurani
Naambiwa hayawani, umezidi chakulani
Chumvi mimi masikini, sina thamani chunguni
Siku sawa sawiani, sitajwi hata kwanini
Akina giligilani, husifiwa kwa mizani
Na mimi sionekani, hata niwe mwema gani
Chumvi mimi masikini, sina thamani chunguni
Daima ni lawamani, sijulikani ni nani
Mpishi pia yundani, ninazidi matatani
Mpishi hana Imani, nitazidi muda gani
Chumvi mimi masikini, sina thamani chunguni
Ninafungiwa koponi, hata nje mi sioni
Nikitoka ni motoni, Maisha yangu chunguni
Nipatapo ahueni, natafunwa mdomoni
Chumvi mimi masikini, sina thamani chunguni
Naililia thamani, kamwe sina abadani
Daima nipo rehani, Maisha yangu chunguni
Nani anipe thamani, mpishi hama amani
Chumvi mimi masikini, sina thamani chunguni
Kaditama mtihani, swali bado li moyoni
Sijui yangu thamani, Maisha yangu chunguni
Sina hadhi duniani, kila siku mi mgeni
Chumvi mimi masikini, sina thamani chunguni
3 Comments
Maashaa Allah shairbzuti.
ReplyDeletethamani ya chumvi ipo waaasp????
Chumvi haionekani thamai yake
Deleteanaitafuta thamani yake haioni
Delete