SHAIRI: TOA KAMBA MGUUNI

1.         Naanza kwa rahmani, njema sifa za manani

Jambo lililo mwanzoni, salama yangu shikeni

Leo siku ya ugeni, moyoni hadi chuoni

Furaha iso kifani, wageni karibieni

2.         Karibu ukumbuni pamoja kufurahia

Karibu sana chuoni, pamoja kusherekea

Yamkini furahani, pamoja tumeridhia

Toa Kamba mguuni, wewe tena si mgeni

3.         Furaha yangu moyoni, japo najenga huzuni

Tunaagana chuoni, hali yangu sio duni

Nimejifunza mageni, wasia ninakupeni

Toa Kamba mguuni, wewe tena si mgeni

4.         Toa Kamba mguuni, zitoe nongo machoni

Mwalimu kwenda shuleni, taaluma iso duni

Kawafundisha mageni, injinia na rubani

Toa Kamba mguuni, wewe tena si mgeni

5.         Wasomi wetu wa sasa, mwalimu kafanya kazi

Tukawapige msasa, kwa nidhamu na malezi

Ubaguzi wenye visa, mwalimu ndie mkwezi

Toa Kamba mguuni, wewe tena si mgeni

6.         Wewe tena si mgeni, mazuri kuzingatia

Watoto walo shuleni, tamaa kutoitia

Wakinge kwa mitihani, uzinifu na udhia

Toa Kamba mguuni, wewe tena si mgeni

7.         Nadhani mmefahamu, hili pia ongezea

Taifa bila mwalimu, madhila yatatokea

Nenda ukawe hakimu, jamii kuizindua

Toa Kamba mguuni, wewe tena si mgeni

8.         Ualimu kwako nembo, popote kuangazia

Usije zidisha tambo, kumbuka kujitolea

Usikunase urimbo, pabaya kujinasua

Toa Kamba mguuni, wewe tena si mgeni

9.         Maisha yetu chuoni, changamoto si kadhia

Kuifeli mitihani, mazingira kuzowea

Chuoni si utumwani, wafalme tutakua

Toa Kamba mguuni, wewe tena si mgeni

10.       Ndugu zetu twawaaga, nyumbani twajirudia

Mazuri yetu kuiga, mabaya kutochukua

Nidhamu sio uoga, walimu kuwasikia

Toa Kamba mguuni, wewe tena si mgeni

11.       Sio mwisho wa kalmia, tamati nimefikia

Nina maliza kusema, ujumbe nimeutoa

Kaijengeni heshima, pamoja kuzingatia

Toa Kamba mguuni, wewe tena si mgeni

Mtunzi: Mwinyi Abdallah

Phone: 0655895599

Blog: maalimupacha.blogspot.com

Email: mwinyiabdallah2012@gmail.com

download hapa Shairi: Toa kamba