IPI HUKUMU KIDINI

Naanza tena kwa hamu, salamu pia muhimu

Naanza kwa majukumu, akili yanidhulumu

Ukimya wanilaumu, kuitolea hukumu

Baraza liloadhimu, salamu alaykumu.

Najua mmetulia, kuwapa langu moyoni

Akilini naumia, ndugu yenu ni swalini

Jibu sijalipatia, lanitesa akilini

Mpenzi nimechagua, ipi hukumu kidini.

Nadhani ipo sababu, kisa kuwaelezea

Alikuwa ni swahibu, mimi kwake nikatua

Nikajenga ukaribu, bila yeye kutambua

Mpenzi nimechagua, ipi hukumu kidini.

Nikaanza kwa utani, mara switi mara hani

Siku nyingi si kifani, mara ukaka pembeni

Nikamteka imani, kila jambo samahani

Mpenzi nimechagua, ipi hukumu kidini.

Simu nikazizidisha, usiku mwingi chumbani

Mara vocha zinakwisha, matusi tele moyoni

Usiku kwangu waisha, simu iko sikioni

Mpenzi nimechagua, ipi hukumu kidini.

Bila shaka mwatambua, ujana sio rafiki

Mihemko yanijia, nikaona ninadhiki

Imani nikaivua, nikataka yaso haki

Mpenzi nimechagua, ipi hukumu kidini.

Mtoto akaridhia, mengi tukajifanyia

Jaribio kuishia, matokeo yanijia

Sasa mimi najutia, mtoto nje ya ndoa

Mpenzi nimechagua, ipi hukumu kidini.

Nawauliza jamani, pia nakukatazeni

Yamenifika moyoni, ndo mana nakwambieni

Haifai jamiini, sijaijua kidini

Mpenzi nimechagua, ipi hukumu kidini

MTUNZI:       Mwinyi Abdallah

                        Mwinyiabdallah2012@gmail.com

0655895599