SHAIRI: SAMAKI BAHARINI

Toka mawio njiani, naelekea kusini

Upepo wa baharini, umenitoa njiani

Nimekwama kisiwani, nawangoja majirani

Nikatupa baharini, nyavu dema kwenda chini

Samaki nilokusudi, ni changu mwenye madoa

Kwa madema sina budi, changu ninawangojea

Nikazidisha juhudi, madema yakapotea

Namuomba maabudi, nyavu ipate tulia

Upepo kuongezeka, gharika ikatokea

Bahari ikachafuka, nyavu ikanipotea

Nyavu nayo kutoweka, changu wakatokezea

Je wali utalika, mpwa nishagaa gaa

Nyenzo nilizotumia, zote zimenipotea

Tatu nilizichukua, ndoana imebakia

Wapi nitaifungia, na changu kuniletea

Ndoana inachagua, chochote kujinasia

Ndoana nimeifunga, kuitosa baharini

Samaki nilomtunga, amechopoka majini

Kidau changu chatinga, sijui nifanye nini?

Kupiga mbizi napanga, majini nizame chini

Wapo wengi baharini, samaki walo wazuri

Kwa changu nipo kazini, madoa yake mazuri

Nishajitosa majini, majira ya adhuhuri

Kuchagua humu ndani, kila changu ni Hariri

Jua sasa limezama, usiku umeingia

Kidau kimetuama, mbele chashindwa sogea

Dua zangu kwa karima, njia imenipotea

Sasa najipa lawama, sina nilojipatia

Tatizo sijalijua, narejea kwanza pwani

Ili nipate tulia, nisizidi matatani

Wazee walinambia, japo najenga utani

Endapo nimekosea, akili niweke chini.

MTUNZI:                             Mwinyi Abdallah

                                         Mwinyiabdallah2012@gmail.com

                                         0655895599